അർദ്ധവിരാമങ്ങളുടെ അനന്തവൃത്തം

വനമധ്യത്തിൽ നിശബ്ദതയെ ഉന്നംവെച്ച്-

കിരാതർ കാത്തുനിൽക്കുന്നു,

വാക്കുകൾ കൊണ്ട് മുറിവേൽപ്പിക്കുവാൻ.

അർത്ഥശൂന്യമായ ആരവങ്ങളുടെ ഈ 'ജനാധിപത്യം'

പ്രശാന്തതയുടെ കാനനത്തിന് തീയിടുന്നു.

ദുർബലരെ വേട്ടയാടുന്ന വായാടികളായ മകരങ്ങൾ,

അവശിഷ്ടങ്ങൾക്കായി പതിയിരിക്കുന്ന സ്രാവുകൾ.

ജീവിതമെന്ന് നാം വിശ്വസിക്കുന്ന ഈ ചളിക്കുണ്ടിൽ,

വ്യർത്ഥമായ തർക്കങ്ങൾക്കായി നാം തുഴയുന്നു.

ഇവിടെ പൂർണ്ണവിരാമങ്ങളില്ല, ഈ പ്രയാണത്തിന് അന്ത്യമില്ല,

അർദ്ധവിരാമങ്ങൾ മാത്രം കോർത്തിട്ടൊരു നീണ്ട ശൃംഖല.

സംശയവും മോഹവും മാംസനിബദ്ധമായ തൃഷ്ണയും-

ചുറ്റിക്കറങ്ങി ഒടുവിൽ ശൂന്യതയിൽ തന്നെ ചേരുന്നു.